終於出發了﹗

我們今天要搭9:20AM的航班，即是7:20AM要到機場，計埋逸逸梳洗咪咪摸摸的時間，5:45AM就要起床了。

屯赤隧道開通之後還是第一次去機場，明明出隧道時已經看到跑道就在旁邊，沒想過原來也要再開一段路才到，是比以前行青馬大橋快，不過又沒有想像中近那麼多。

冬天比較晚天光，我們7:15AM在機場看到日出，完全是意料之外的驚喜﹗

久違了的香港國際機場~

首先去CHECK IN寄行李，CHECK IN時地勤會檢查埋Q-CODE。實在太耐無坐過飛機，竟然搞亂咗以為POWER BANK一定要寄倉，原來掉轉咗，結果要即刻係行李箱拎返出嚟。

寄好行李就去食早餐，三年的疫情對於旅遊業真係重創，我最愛坐飛機前光顧的翠華招牌仍在，不過不知是沒有營業還是早已倒閉，我們只好去光顧CAN-TEEN。

早餐食飽飽

機場好多吉舖，難得搵到靚靚影相位，希望旅遊業可以快啲恢復元氣喇~

逸逸的愛貓KIKI都同我地一齊去旅行

打咭位非常BUSY

我地就係坐後面依架飛機喇~千祈唔好話小朋友去旅行無記憶，疫情前的逸逸只有3歲，卻已有非常豐富的搭飛機經驗，所以雖然已經3年無坐過飛機，逸逸對於坐飛機完全沒有陌生的感覺。

航空公司送俾小朋友的禮物

起飛喇~

逸逸小朋友坐飛機最重要就係睇電視，大個咗真係唔同晒，3歲的時候係飛機睇熟悉的FROZEN卡通睇一陣就無耐性，只能看短卡通；今次竟然能夠自己完成一套未睇過的英文卡通電影，仲覺得好睇到回程時要再睇。

亦因為咁，我就可以毫無壓力之下舒適的看自己喜歡的電影，去程我睇咗毛舜筠、姜濤同埋柳應廷主演的《阿媽有咗第二個》。

間中都欣賞一下美麗的藍天白雲~

今朝早餐都未落格就又話食飛機餐。

唔知點解去旅行坐飛機就會想飲蕃茄汁，平日係一定唔會買的。我揀咗個中式早餐超級難食，牛肉又鹹又粉，炒麵無味，好彩我唔肚餓，反而恆仔揀咗個西式早餐有個疏乎厘蛋好似幾唔錯。

見到舖上一層白雪的首爾了﹗

順利到達仁川國際機場，過關程序跟以往也沒有多大變化，只是多了一個SCAN Q-CODE的COUNTER，不過監管好鬆散，我地行埋COUNTER SCAN Q-CODE時職員眼尾都無乜望過我地，聽阿妹講佢地入境時有係COUNTER量體溫，但係數日後過關的我們就已經不用量體溫了。

逸逸喜歡的BLACK PINK歡迎我們來到韓國，我地都好歡迎你地嚟香港開演唱會，可惜搶唔到票。

可愛的PINKFONG行李車

今次我地繼續住明洞，所以去搭熟悉的6015機場巴士，不過機場實在太大，我們出閘的地方對出的巴士全部去外區，搵咗一輪先搵到6015的站頭。

依家係機場唔再可以上車買票，要先係售票處買好票再等車。

依家的氣溫係0度，我竟然不用穿羽絨，感覺上香港10度的時候仲凍。不過逸逸的怕冷體質就現晒形，影完依張相之後就又要戴手套又要戴頸巾都仲話凍。

今朝一大早起身，坐飛機時又全程睇電視無瞓過，一上機場巴士就呼呼大睡了。

無諗過漢江竟然都會結冰

今次我地入住返當年去BABYMOON時住的明洞SKYPARK III，貪佢既近地鐵站又近機場巴士站，去明洞逛街買小食也非常方便。

好耐無住過外地的酒店，所以一早俾定心理準備逸逸，在外地住的酒店一定沒有香港住的漂亮，幸好她也覺得今次的酒店不錯。我地預約了三人房，酒店提供了四人房給我們，最令逸逸興奮的就是房間有浴江可以浸浴。

好肚餓，我地係酒店下面便利店買咗香腸做下午茶，食少少嘢休息一下先出發去玩。

Comments

comments