大棠有機生態園‧關聖帝君文化園

二零二二年五月二十八日(星期六)

今個星期六無乜特別節目,又係時候帶逸逸外出走走,親親大自然。

逸逸話想餵動物,其實我有研究過去其他農莊,不過因為天氣不太穩定,還是去既熟悉門票又比較便宜的大棠有機生態園。

入園首先同駝鳥SAY HELLO~

今次馬房開咗門,我地入咗去參觀下,順便問逸逸想唔想試下騎馬。膽小的逸逸連係馬前面影張相都戰戰兢兢,當然唔敢騎馬喇~

雖然我地無騎馬,都去咗睇人地騎咗一陣~

逸逸係旁邊遊樂場玩咗一陣繩網,係依方面逸逸比以前算係勇敢咗~

最重要的節目:餵動物

首先餵下龜

再去餵魚,今日我地早嚟,無乜人餵魚,啲魚睇起上嚟超級肚餓,搶食搶得好誇張。

餵完魚就係下一站去動物農莊餵兔仔同埋山羊。

今次好好彩,我地見到孔雀開屏呀~

餵兔仔

餵山羊

無限LOOP之後就返嚟餵魚

四張遊戲券換咗兩包魚糧同埋兩杯蘿蔔,對於逸逸嚟講,大棠有機生態園的節目就已經告一段落。

隨便四圍逛下,見到有隻恐龍,於是我地講到如果有恐龍襲擊要走去邊,逸逸話要扮石頭,我話LEE埋係廁所臭親佢,恆仔話跑去廚房等恐龍食其他嘢喎~

行下行下發現一個關聖帝君文化園的BANNER,我地又即管行去睇下。

沿路見到成個木馬屠城記的木馬,估計同恐龍一樣,隨便搵啲嘢擺下俾人影相。

行了一段大斜路,終於來到關聖帝君文化園,有一個很大的關帝像。

廣場好濶,都幾有氣勢,影相幾有型﹗不過今日雖然未算萬里無雲,但係依度真係萬里無人,而且熱到爆~

仲有一個無乜嘢睇極小型博物館,平日見過巴士車身廣告宣傳依度會搞活動,唔知有活動時會唔會熱鬧啲呢?

問返逸逸今日最鍾意玩乜,佢話最鍾意餵魚,至於我,就最鍾意可以曬下太陽郁下。

Comments

comments

發表迴響

你的電子郵件位址並不會被公開。 必要欄位標記為 *