二零二一年十二月二十二日(星期三)
可能因為冬天的關係，躲在暖暖的睡袋入面好舒服，是露營經驗之中睡得最好的一次，如果不是因為聽到外面啲啲嗒嗒的聲音，應該還可以繼續睡下去。起初還以為是在下雨，還在想是不是要收起放在外面的座椅，望出去才發現原來只是風聲。
逸逸聽到我們移動的聲音也醒過來，她整晚也算睡得不錯，除了轉身比較多之外，也沒有睡不著覺的問題，反而最大的問題是她受不住睡袋的束縛，很快就從睡袋逃脫了出來，幸好我們怕凍特地多帶了一張毛毯，結果整晚她是像在家一樣蓋毛毯睡覺。
大家7:00AM就起床了﹗
起床後才發現原來昨晚我地忘記咗食蕃薯，依家已經出晒水，唔食得LU~
我們兩母女出去梳洗，順便散下步，逸逸好鍾意依啲彩虹風車。
大農夫與小農夫
依到真係有農田架~
仲有士多啤梨園
同埋百香果園
我地都無問有無得摘水果，另外BOOK場時其實都可以報名參加PIZZA製作班，印象中要有四組參加先會開班，如果參加就會係第二天早上舉行，不過我地都無報名。
仲有經歷咗啲風霜的小動物可以影下相，佢地仍然能獲得小朋友歡心架。
未煮早餐之前，先煲熱水沖咖啡，今次只係帶咗即溶咖啡，用煮麵個煲煲水，唔係太方便，不過冬天的早晨在戶外飲一杯熱咖啡真係好正。我已經買咗一個小水煲，下次露營可以飲手沖咖啡。
嘆啡中……
今日的早餐係食公仔麵，恆仔煮麵時逸逸就睇卡通片。
開餐囉~
今日雲層好厚，不過唔落雨已經好唔錯。
我地玩下橡筋繩
又打下羽毛球
除咗我倆各自同逸逸玩之外，我和阿恆也有切磋一下。諗返轉頭，我地兩個識咗就嚟二十年，還是第一次打羽毛球……
後來我地去咗對面草地打羽毛球，好大風時就影下相。
跟住又放下風箏，今日放得比昨日更高，在空中停留的時間更長，亦都跑到我索晒氣……
阿恆都偷少少時間嘆一陣……
我們要中午12時前離開營地，大約10點就要開始執拾，唔係熟手技工的我倆真係要花好多時間去處理睡袋、天幕、帳篷、枱椅……特別困難的是將鬆軟的睡袋和漲起的枕頭收好。
差唔多11點半終於大功告成，而我們的粉紅色帳篷亦宣告壽終正寢，條骨斷咗，始終個帳篷本身係諗住買去沙灘或野餐，唔係諗住用嚟過夜，只係當時覺得太大最後無用放埋一邊。放得太耐無用的東西特別易爛，下次要正正經經買過一個帳篷，同埋要用多啲。
自己垃圾自己帶走，將垃圾和爛帳篷帶到附近垃圾站之後，我們今次親子CAMPING初體驗正式完滿結束，一家三口都非常期待下一次的露營啊﹗