因為疫情關係，無得出外國旅行，只是不停的住港九新界不同地區的酒店，發掘香港有趣的地方。
今年聖誕前拎咗一個星期大假，都想安排特別的活動。12月初已一早約好爸爸媽媽和妹妹一家一齊住酒店，無理由又住酒店；近年興起去Glamping親親大自然，都有興趣試吓，睇吓價錢點知仲貴過住五星級酒店。直至有一晚恆仔去參加婚宴，同枱有幾個露營發燒友朋友，返喇之後傾吓傾吓不如就試吓露營喇！
係逸逸出世之後，我同恆仔傾過帶埋逸逸的露營初體驗最好係去蝴蝶灣，補給方便又有得泊車，搞唔掂直接返屋企，可惜政府露營地因疫情關係仍然封閉，因此我們也偏向選擇可以泊車的營地。上網瀏覽一下，選擇也很多，但我對Autocamper的大江埔營地一見傾心，因為它有獨立營位，感覺比較安心，而且車可以泊在營地，不用將東西搬來搬去，好快就決定了地方。雖然後來在社交媒體對此營地有不少劣評，特別是同是Autocamper經營的紅花嶺營地評價特別差，也讓我在出發前也有點忐忑，幸好最後對大江埔營地非常滿意，玩得好開心。
訂好營地就要添置用具，除了帳篷和枱之外，基本上全副武裝要重新買過，幸好屯門最近開了Decathlon，依個世界又有偉大的淘寶和$12店，都洗咗唔少錢總算基本裝備Ready。
只是人算不如天算，12月竟然都仲會打風，我們出發當日早上還在掛一號風球，我們也因此臨急臨忙再添置多一個天幕，又買定Pack暖包，欲知我們親子露營初體驗的詳情，留待下回分解⋯⋯