二零二一年七月十五日（星期四）
早上起床，先到酒店餐廳吃早餐。
自助餐桌上有炒麵、饅頭、蒸番薯粟米等簡單食物，也有果汁咖啡奶茶自由享用。
另外，每人再揀一份主菜，炒蛋、烚蛋，奄列都可以。
今次旅程，逸逸成為了黏婆狂人，做乜嘢都要黏住婆婆，連食早餐都要坐婆婆隔離，阿媽係邊個已經變得唔重要。
疫情期間，食自助餐出去取食物時戴返口罩是基本要求，這天有一個阿伯非常唔聽話，職員再三提醒甚至大聲叫佢叫到全餐廳都聽到佢都完全不理會，真氣人﹗
食完早餐返房預備一下再出發，順便再欣賞一下依個靚爆鏡的View。
話說逸逸超級鍾意依個露台，只要係房無特別野做的時間，都要係依個露台玩。佢話個露台係城堡（公主嘅屋企），佢不停進進出出開門關門去返工、返學、買唔同嘅嘢，非常忙碌。由於她也清楚知道嚴禁自己一個鎖自己係露台外面，所以一定捉我出去坐陣。
出發喇！今天早上的節目是去行山，地點是酒店右邊的小長城。
我們首先向著觀音灣泳灘的方向出發，首先經過長洲滑浪風帆中心露天茶座，門外掛著滑浪風帆體驗的價目表。爸爸覺得好貴，媽媽覺得好曬，我就好想試吓，大家看到同一個訊息而有不同的即時反應，好有趣。
觀音灣是香港首位奧運金牌得主滑浪風帆好手李麗珊的練習場地，所以，觀音灣有一個寫住滑浪風帆第一灘的牌匾，我哋都要打下卡。
好靚嘅壁畫
後面就是觀音灣了
果然跟東灣不一樣，沙灘上放有不少滑浪板，還看到有攝影CREW正在這兒拍攝，應該是介紹水上活動吧！
扮晒嘢Chill一Chill
我們正式開始上山
話說逸逸行山的經驗唔算多，可能去慣迪士尼，平路可以行好耐都得，一行斜路就好快話累無晒力，最後就係今次行山創作咗三句金句，分別是：1）行得快食海帶；2）行中間食豬㬹；同埋3）慢吞吞食雲吞。各人時快時慢，有時帶頭，有時墮後，講講笑笑，我食海帶時就笑下你食雲吞，唔覺唔覺又完成一段斜路。
途中發現這種好有趣的植物，原來叫做假苹婆，橙色成把遮咁嘅樣再吊住一粒粒黑色的是假苹婆的果實。現在一邊行山可以一邊認識不同的植物，不得不讚一下植物識別Apps。
明暉營是天主教明愛轄下的營舍，是天主教避靜勝地之一，所以大家對這兒都有不同的回憶，一點也不驚訝，最意想不到的是回憶竟然可以追溯到媽媽的中學時代，當年她原來就是在明暉營參加畢業營，究竟明暉營有幾耐歷史？
行下行下我們亂打亂撞來到明愛陳震夏郊野學園，爸爸媽媽有舊同事在這兒工作，曾經帶過他們來參觀。明愛陳震夏郊野學園外面有一個聖像，是St Francis of Assisi。我們曾經到過意大利的Assisi朝聖，看到這個聖像有不一樣的感覺。
跟住大家向返小長城觀景台出發
這個角度可以看到又稱啞鈴島的長洲啞鈴般的形狀
小長城其實是條輕鬆易行的家樂徑，其扶手欄杆設計看似萬里長城，外形獨特，因而得名。
終於來到我們的目的地小長城觀景台了
登高望遠，望下個海已經好舒服，至於啲奇珍異石我哋就無特別留意了。
在觀景台的涼亭休息一下，補充水份，談天說地，休息夠就回程落山。
返到落觀音灣見到有人玩緊獨木舟，好羨慕，不禁諗返起當年係澳洲連替換衫都無帶就同阿妹義無反顧咁落水玩獨木舟⋯⋯