趁生日連續放五日假，假期的第一天恆仔要出灣仔，送完逸逸返學兩口子撐枱腳食完個早餐之後就分道揚鑣，待會兒我要負責接逸逸放學。
一直已經好想行下藍地水塘，之前曾經同恆仔試過係富泰邨搵上山的入口失敗而回，由最多人出發的何福堂入口出發驚趕唔切接逸逸放學的時間，大家都在藍地大街離開卻沒有看到介紹藍地大街出發的路徑⋯⋯最後我竟然搵到一個係嶺南大學出發的YouTube，今日即管就試吓挑戰藍地水塘吧！
10AM由嶺南大學旁邊的富地路出發
好快就轉咗上山，可以遠眺市區的高樓。
好快就去到地標虎地燒烤場
轉左行就係前往藍地水塘的方向
因為沒有做太多功課，途中一個落山的分岔，令我誤會係轉落藍地水塘的路，有一個同樣打算去藍地水塘的婆婆也有此懷疑，還叫我幫手睇睇係唔係依條路，落到底先確定行錯路，唯有折返。
原來剛才的小徑行到盡頭先係落藍地水塘的梯級
終於來到藍地水塘了
環境好靚，加上無乜人，非常舒服。
回程的時候剛才遇到的婆婆正拿著她的拉車下樓梯落水塘，有兩個女仔見到婆婆有點狼狽主動話幫她拎拉車，結果遭婆婆拒絕，原來拉車是她的拐杖，如此CLUMSY的拐杖，其實是輔助還是負擔？
10:45AM就已經返回虎地燒烤場，時間尚早，決定向虎地郊遊徑進發，改為景峰花園落山。
中途要轉入屯門徑
一路上頗多高低起伏上落樓梯，挑戰心肺機能；途中可以欣賞各式各樣的植物，印象特別深刻的是看到紐西蘭常見的卷卷。
最後由嶺南大學上山景峰花園落山，行青山公路只要10分鐘路程⋯⋯
最後全程行了85分鐘，總路程5.27公里，爬升了316米！
趕及嘆返杯 Heato Coffee的 Ice Latte先去接放學
後記：
話說接逸逸放學的時候，逸逸看到我大汗淋漓覺得好奇怪，於是我話佢知剛才去咗行山～
逸：你一個人去行山好危險架
媽：🥰🥰
逸：你會俾壞人捉咗
媽：🤣🤣 唔駛擔心，壞人唔捉大人，淨係捉小朋友，所以你一定要拖實爸爸媽媽⋯⋯