STAYCATION@JW MARRIOTT – DAY 2 – 海洋公園(下)

食完午餐就出發去睇熊貓。

大熊貓之旅要排隊,恆仔排隊我同逸逸去隔離鱷魚潭睇揚子鱷,旁邊山洞仲有隻假嘅可以摸下架,逸逸超級興奮,仲特登要帶爸爸去睇。

入到去大熊貓之旅,盈盈樂樂影都唔見,淨係見到小熊貓⋯⋯

出口順路先睇娃娃魚

再睇小爪水瀨

同埋各式各樣的金魚

剛才係大熊貓之旅睇唔到熊貓,我們再去香港賽馬會四川奇珍館碰碰運氣。

我地見到好活潑的大熊貓安安呀!佢係度好忙碌咁食緊野。

但係點解無川金絲猴睇既?

之後我哋去咗海洋奇觀睇魚

好似落咗深海的感覺好治癒

我真係好鍾意睇魚同動物,但係去慣迪士尼玩ride的逸逸開始唔耐煩,佢話想玩佢鍾意既嘢。我唯有好坦白咁同佢講,啱你玩既已經玩晒,依家到你陪媽媽睇媽媽鍾意嘅嘢喇。

不過都可以再玩一樣逸逸鍾意的,就係坐海洋列車去高峰樂園。

第一時間當然係探下企鵝仔,佢哋游水真係超級快!

跟住去咗熱帶雨林天地,點解鸚鵡都唔識講Hello既?

過嚟依邊的重點當然係去探恆仔最鍾意嘅侏狨喇

無瞓晏覺嘅逸逸體力已經差唔多耗盡,於是去最後一個景點,我揀咗去尋鯊探秘睇鯊魚。

點解咁多人排隊睇鯊魚架?

終於入到去,首先同假鯊魚培養下感情先。

果然預先培養感情真係有用,逸逸睇得好投入呀!

最後我地坐第三次海洋列車返回海濱樂園。

因為酒店送咗甜筒coupon,所以一早同逸逸講好臨走時食雪糕,點知兜咗幾個圈都搵唔到個counter,問職員都唔多清楚⋯⋯

最後只好買咗杯Haagen Dazs俾逸逸食,應承咗個女既嘢我一定做嘅,一邊食雪糕一邊睇噴水池表演。

食完雪糕就搭地鐵返金鐘去酒店拎返行李,就直接坐的士返屋企,逸逸一上到的士就呼呼大睡了!

期待住下一次的香港小旅行。

Comments

comments

發表迴響

你的電子郵件位址並不會被公開。 必要欄位標記為 *