二零二一年四月四日(星期日)
復活節連清明節一連五日長假期，實在是一個最好的藉口來一個staycation。
自從十多年前在金鐘JW Marriott吃過一頓超高質的Dinner Buffet後就對這家酒店充滿好感，加上今次推出一個名為Ocean Park Family Fun Package，套票包左兩大一小早餐Buffet+海洋公園入場券，正合手持迪士尼樂園金咭復活節Long Weekend不能入迪士尼樂園玩的我們。
出發喇！我哋搭西鐵線去到尖東站再轉荃灣線去金鐘。
對於大鄉里逸逸來說，這個平面電動行人步道超級有趣，特別是跟近日經常在玩的電視遊戲Ring Fit入面其中一個部分很似，成為今次旅行其中一個印象深刻的部分。
我們未夠12點就到達JW Marriott了，Check in只是小排隊，而且酒店已經可以即時安排上房，實在太好了。
房間是唔算大，但很舒適。曾經熟悉但已變得越來越陌生的金鐘街道就是我們房間的City View。
本來今次Staycation諗住去酒店泳池游水，裝備都已經帶齊，但check in時櫃枱職員已講話因為現在的防疫措施係只可招待30%泳客，所以好Full，不過都可以去試吓Book。不過今日天氣比較清涼，逸逸好容易凍親，所以直接放棄。
安頓好就出發去吃午餐，我們搭兩個站地鐵去上環，目標係文咸東街的La Casa Burger & Pasta，去到摸門釘，係喎，放假放到唔記得咗今日係星期日，佢哋星期日休息的！
結果我們去咗附近的貳號冰室，恆仔食午餐，我同逸逸Share左公司三文治，好彩依一間係好食的茶記！
跟住做乜好？一場過到嚟上環，就諗起華爾登餅店的朱古力曲奇，不如去西環行下。
於是我哋又去坐地鐵，係上環站見到有一個藝術展覽，展出的是由中小學生使用立體打印筆繪製的立體藝術品，都做得好靚㗎。
我們由上環站搭一個站去西營盤站。
我都唔知原來西營盤站入面有充滿香港情懷的浮雕壁畫，每個細節都港味十足，真係好值得慢慢欣賞。
都唔記得華爾登餅店的確實位置，所以出咗站之後都係跟住Google Map走。
經過水族館睇吓魚睇吓龜
經過第二街公共浴室。
第二街公共浴室在1925年落成，其落成和當時的鼠疫有關，當時政府為改善公共衛生，遂興建公共浴室改善社會設施。現時香港只有三個公共浴室只提供淋浴而沒有提供廁所服務，而第二街公共浴室是歷史最悠久的一間。
終於來到華爾登餅店，點解個位置同舖面個樣完全唔同？原來係搬咗舖，好彩我哋唔係靠記憶而係跟住Google Map去。目標當然係我最鍾意食嘅朱古力曲奇(傳統果醬曲奇)，其實佢仲有好多細個時成日見但絕跡多持的傳統西餅，我哋都買咗幾款，不過，華爾登餅店真係只得曲奇好食，蛋糕實的的有點難吃，以前買過賀年食品都唔得，下次除了曲奇都係唔好再買其他食物。
買完餅就搭地鐵返酒店食件曲奇飲杯咖啡Tea一Tea，之後就陪逸逸瞓晏覺了。
難得住在香港公園旁邊，本來一心想趁機會去香港公園觀鳥園睇雀仔，逸逸咁早就眼瞓，還是放棄吧！