都唔記得幾多年無去過東薈城，有一日本來諗住去屯門市廣場食午餐同埋買少少嘢，突然間心血來潮覺得經屯赤隧道去東薈城都好近，於是驅車前往。
那天在東薈城的金子半之助吃了一頓滿意的午餐，逛下超級市場和outlet，總之當日很開心，還說之後要再來，怎料卻帶來了一連串麻煩。
30/4/2021新聞公佈有一名感染變種病毒源頭不明的菲傭曾於26/4/2021到過東薈城，正好遲我們一天到過東薈城，讓我們鬆一口氣之際，到4/5/2021新聞又公佈原來首宗流入社區的變種個案29歲印度男及其女友曾跟29歲菲傭同於11/4/2021曾到東薈城，於是5/5/2021政府就要求由11/4/2021至26/4/2021曾經到過東薈城的都要強制檢測！
5/5/2021（星期三）早上看到要強制檢測的公告，立即通報公司並要立即安排work from home，上網查看社區檢測中心的預約的資料，發現最快也要兩日後才有位，於是就直接去檢測中心walk in，過程非常順利，15分鐘內完成檢測，也沒有想像中咁唔舒服，最後亦於24小時內收到檢測結果。
最大的問題反而來自逸逸，6歲以下不適宜採集鼻腔和咽喉合併拭子樣本，只能收集深喉唾液，問過做醫生的阿妹話朝早8點半去屯門診所排隊應該拎到深喉唾液收集樽，但根據經驗4歲半的小孩未必識吐口水，回家一試，逸逸果然做唔到，原來刷牙識吐水唔代表識吐口水，於是開始咗我們的糞便樣本瓶大作戰。
打電話去強制檢測熱線，職員表示去臨時檢測中心有糞便樣本瓶，仲幫我check左屯門區最近係建生邨，又俾埋民政事務處的電話話如果去到派晒可以問吓下一批樽幾時到，於是我們下午就去咗建生社區會堂，順便恆仔做埋檢測採樣。恆仔檢測也是非常順利，亦於翌日收到檢測結果，但臨時檢測中心告知他們沒有派發糞便樣本瓶，話政府診所才有。
6/5/2021（星期四）逸逸不能上課，我8點半就去到屯門診所排隊拎9點開始派發的深喉唾液收集樽，每日200個quota排到我時已經派咗一半，拎完樽就去旁邊收集樣本的counter問下拎糞便樣本瓶的方法，佢哋就答我得幼稚園同私家醫生有，我想講同日我同事的仔仔幼稚園要強制檢測，佢都係度撲緊糞便樣本瓶，在屯門診所看到衞生署有關COVID-19的查詢熱線，於是打去問，職員好肯定咁答覆我要打去強制檢測熱線要求索取糞便樣本瓶，下？我昨日咪打去依個熱線俾佢老點咗囉？
沒有辦法之下唯有再打依個打極都唔通的強制檢測熱線，終於打通之後原來真係有得登記，登記完要等佢上司批核，成功後會收到有barcode的電郵，再去仁愛診所胸肺科拎，時間是星期一至五上午9時至12時，即係最快要星期五先拎到。
7/5/2021（星期五）逸逸繼續無得返學，朝早去仁愛診所胸肺科拎糞便樣本瓶，點知竟然又唔駛掃barcode又唔駛登記，都唔知點解攪到咁複雜。下午開始就開始瘋狂俾逸逸食通便的食物包括乳酪、火龍果等等，終於晚上順利收集到大便，第二朝交樽，星期日收到結果，星期一可以返學。
得來不易的糞便樣本瓶
幾經調查後發現原來染疫菲傭和印度男及其女友原來有連帶關係，菲傭並非感染源頭不明，但政府堅持由11/4/2021至26/4/2021曾經到過東薈城的都要再次進行強制檢測。
15/5/2021（星期五）晚上才得悉強制檢測公告，翌日我和恆仔就去建生社區會堂採樣，星期日晚就收到結果，本來好安心因為上次拎定咗糞便樣本瓶，點知逸逸的腸胃就唔合作，到星期日晚先收集到佢啲屎屎，明明平日差唔多日日都有的，唉⋯⋯
點知禍不單行，星期一交咗樽諗住星期二有結果，星期三佛誕假期，星期四點都可以返到學，最後卻星期四先收到結果，又白白返唔到三日學，要知道係疫情期間面授課有幾矜貴。
幾年都唔去一次東薈城，帶來咁多麻煩特別覺得唔抵。因為今次經歷，真係聽到東薈城已經怕怕唔想再去了。