二零二一年一月十九日(星期二)
去年因為逸逸成日眨眼帶咗佢去睇眼科，眨眼個度無發現到特別問題，但視力檢查就需要跟進，如果無進步就要戴眼鏡。
今日請咗假早上陪逸逸眼科覆診，視力合格，即係下晝無嘢做，上次去大棠賞紅葉時發現了大棠有機生態園，不如今日去玩下啦。
大棠有機生態園地方好大，付入場費後入到去其實玩好多嘢都要另外俾錢，我哋買咗4格活動套票，睇吓有咩啱心水都可以試吓，無嘢啱都可以用來換有機菜帶返屋企。
入場後先見到好懷舊的無冷氣巴士，記得小時候正值開始引入冷氣巴士，但永遠唔知道下一班車有冇冷氣，有冷氣的車費就貴啲，我估等巴士時我就想嚟架冷氣巴士，我媽媽就未必咁諗。
旁邊就係一個小型農田，除左好靚嘅花之外，仲見到平時會食的蕃茄和南瓜，可以介紹俾逸逸認識。
同一地方同一時間可以欣賞到櫻花和黃葉，你話幾Amazing。
除咗植物，仲有好多動物，好可惜睇唔到孔雀開屏。
嘩！山坡下面有一大群羊呀，逸逸要企高啲先睇到。
跟住我地入咗去動物村，用一格活動套票換咗一杯紅蘿蔔餵小動物。
依度可以餵兔仔同羊咩咩，不過羊咩咩實在太活潑同埋進取，其實連我都有啲驚，所以情願餵都好進取的兔仔，起碼兔仔圍得密實啲無咁驚。
依兩隻細嘅羊咩咩走咗出嚟，我哋見到有個女士蹲下逗緊其中一隻羊之際，另一隻羊竟然兩隻前腳都踏上了她的背上，實在太嚇人了。
不過逸逸對於餵動物真係樂此不疲，最後我哋係度用咗三張活動套票換左三杯紅蘿蔔。
至於最後一張活動套票，就用嚟換咗魚糧餵魚。魚糧都好大包，荷花池的魚唔算好肚餓，後來又越嚟越多人餵魚，我地臨尾要花少少努力去搵仲食得落野嘅魚完成埋剩返的魚糧。
另外，我哋都花咗唔少時間玩繩網。
逸逸又惊又要玩，好攪笑。
因為疫情關係好耐無玩依類遊樂設施
所以玩到唔捨得走
玩得太盡興，亦用盡晒energy，見逸逸咁嘅狀態唯有返屋企，結果因為太累控制唔到自己扭計唔肯走😓
最後一上車就瞬間睡著了。
下次再來希望可以玩下騎馬同滑草呢！