受疫情影響，香港迪士尼樂園自今年1月26日開始暫停開放，停業接近5個月，終於在6月18日重開。我們見疫情稍為緩和，也於7月7日決定帶逸逸去迪士尼玩下。
我們買了香港居民專享「三人遊 二人價」奇妙優惠，即一日門票買二送一，買免費送每人一個迪士尼頭箍。因為今年睇嚟都無機會外遊，所以入園前就決定升級迪士尼年票，用這個優惠門票升級差額以正價門票計算，係真正的優惠。
疫情之下，所有入場人士須透過入園系統預約入園，入園前要先量體溫，還特地在迪士尼港鐵站對出set左專門用來量體溫的帳篷。
快要入園的時候竟然落起大雨，我們在量體溫的帳篷下避了一陣雨再出發。
上次來迪士尼係2019年10月，因為社會運動無左好多內地遊客，當時話過從來未見過咁少人的迪士尼，點知原來低處未算低⋯⋯
放晴就除返件雨褸，但係口罩就要戴足全日，依個都係對逸逸來說好大的挑戰。
同事知我打算買年票，提醒我入場之後先去搞左先，因為依家奇妙處處通會員做緊快餐買一送一優惠，食飯可以抵D。第一時間去到會員中心，職員提醒我們要先換免費送贈的頭箍，因為UPGRADE會收左我們的優惠門票。
其實不用加錢的都是經典款式，選擇不多，我和恆仔當然不會加錢，只是加錢讓逸逸選擇自己喜歡的。
攪掂晒手續，可以開始玩了！
新城堡就快起好了，好靚呀！
第一站係逸逸期待已久的小小世界，之前只是喜歡，今次玩完直頭係著左迷。
之後係自少已經好喜歡的轉轉杯，一邊烏低身影依張相一邊轉，轉到我頭都暈埋，我有一瞬間質疑自己係咪年紀大左頂唔順，哈哈。
跟住去玩轉轉馬
好期待FROZEN園區，聽講2021年落成，希望趕及我地年票到期前開幕喇！
之後去玩小飛象
逸逸開始有興趣操控高低
去到反斗奇兵大本營，暫時仲係唔敢再玩綠色遮遮，但係可以試下彈弓狗，玩完好鍾意。
上次來的時候發掘了迷離莊園的大冒險家餐廳，今次就選擇在這兒午飯。
因為遊人太少部分Counter無開，無緣食到Menu見到的人蔘雞湯，結果食咗印式牛油雞，恆仔則選了日式咖喱炸雞，味道都唔錯。幫逸逸點了一份兒童餐，最令她印象深刻的就係原個蘋果連皮食，到今日偶然食蘋果佢都會叫我唔好削皮。
今次有優惠，原本大約百五蚊一個餐，叫左三個餐都係二百幾蚊，真係抵食好多。
大冒險家餐廳隔離就係迷離莊園，逸逸細個時玩都有D驚，點知大個左仲驚，仲馬騮Albert屋企好恐怖，唔想再玩。
越來越多嘢唔玩咁點算？
之後我地去玩飛碟
然後再玩小小世界
接住落嚟就去睇迪士尼魔法書房，上一場經過時見到仲有15分鐘先開場就已經Full左，今次再經過仲有得排隊就即刻入去，可能同只可以坐50%觀眾的政策有關，依度成為左成個迪士尼最多人的地方。
之後再來第二次轉轉杯
同埋第三次小小世界
我們大約11:45AM入場，12:45PM開始玩，6:30PM離開，竟然可以玩到咁多嘢，可以諗下迪士尼真係少人到一個乜嘢地步。
臨走飲杯菠蘿冰解下暑，正！
疫情之下的迪士尼，真係做左好多防疫措施，包括排隊有足夠社交距離、遊樂設施隔行坐、中間不時有職員做消毒、玩完每一樣遊樂設施出口都提供酒精消毒啫喱等等，感覺係樂園玩可以好放心。
不過，沒有巡遊及沒有迪士尼朋友的迪士尼確實有點單調，好明顯第二次閉園重開後有關注到這個部分。