公司福利之海洋公園一日遊

這次海洋公園之旅,原本是在9月29日的公司包場活動,公司包兩張免費門票,逸逸差一天才3歲,正好趕及一家三口免費玩一天。

最後因為社會運動周圍太亂沒有去,公司與海洋公園協商了可以憑當日門票於12月31日前入場,附送的4張$40現金券也延遲有效期至12月31日,結果我們終於在12月30日到海洋公園一遊。

已經3歲的逸逸要買票,我出發時才透過klook購買,價錢優惠之餘voucher轉頭就收到,直接在入口scan QR code入場,超級方便,想起以前有一次在中旅社買優惠票,到現場要再到票務處排隊換票排了一個小時⋯⋯

一入場就見到威威司令,影返張合照先,見唔見到逸逸拖住威威司令隻手?

因為見到威威司令的原故,逸逸話第一站想去睇海獅喎,於是我地去搭登山纜車,不過途中首先殺出第一個程咬金,就是逸逸稱之為轉轉魚的海洋版MERRY GO ROUND環迴水世界。

海洋公園近月遊客量已經驟降,加上我們來這天是星期一,還是第一次排咁短時間就有得玩。根據環廻水世界的要求,未滿五歲的小朋友只可乘搭雙人座位,但雙人座位都是顏色比較深沉的大魚,逸逸話好想坐橙色的毛仔,不過無辦法喇!

第二個程咬金就是環廻水世界的澳洲歷奇,既然經過梗係順便探埋樹熊同袋鼠喇!

看到啡色和白色的袋鼠,不過沒有紥紥跳。

樹熊安靜的在睡覺

今次最觸目的是這隻笑翠鳥,叫起上嚟真係好似哈哈大笑咁既聲音,超級搞笑。

我地終於登上登山纜車,今天又係搭紅色,好似近年搭親都係搭紅色咁。

前往睇海獅的第三個程咬金是海洋摩天搭,因為可以攀升至72米的高空,全方位欣賞香港仔和離島的海岸景色,所以深受遊客歡迎,也因此經常大排長龍,難得今次排隊的人不多,我們也坐上去欣賞一下風景。

風景真的很美,也可以高角度看到海洋公園的不同角落。

不過最吸引我們注意的就是興建中的水上樂園,好期待啊!

終於來到觀賞海獅的太平洋海岸。

可以從岸上和水底兩個角度觀賞海獅和海豹的動靜,很cute,也讓恆仔和我想起紐西蘭的seal colony。

每個景點都是gift shop,逸逸對這隻海豚公仔特別愛不釋手。

見到車或軚盤都如著了魔般的逸逸。

韓式烤魷魚實在太香,忍唔住買咗一包黎食,逸逸由起初唔太接受到變得食到停唔到口,我諗依一日食魷魚的份量,遠超她以往所吃的總和。

近年海洋公園入面我最愛的餐廳就是可以觀賞企鵝的冰極餐廳,所以我在太平洋海岸的時候已經預先遙距取票排隊,到我們來到冰極天地的時候還要等約10張枱,我們本來先去南極奇觀睇企鵝,點知突然跳到我張飛,我飛奔過去餐廳已經過左,唯有乖乖坐著等後補。

入座點菜之後,就同逸逸去睇下企鵝先,企鵝真係好可愛呀。

我們點了一份繽紛閃爍聖誕套餐,湯是龍蝦濃湯、前菜是香煎帶子蝦沙律伴淡雪士多啤梨莎莎配慢煮蕃茄及山葵牛油果醬、主菜選了威靈頓雞肉、甜品則是淡雪士多啤梨慕絲及聖誕樹頭蛋糕伴鮮果。樣樣味道都唔錯,特別是威靈頓雞肉,好嫰。本來飲品可以選聖誕特飲,不過入面有薄荷成份,還是飲咖啡比較啱我。

另外我們又單點了一客咖喱吉列豬扒飯,豬扒炸得好脆,逸逸超級鍾意食。

另外我們點了一客好fancy的兒童餐俾逸逸,見到都開心。

後來我們又見到企鵝餵食同埋開造雪機噴雪,恆仔同逸逸仲見到企鵝滑倒差D跌落水,逸逸回家後仲成日提住,我睇唔到依一幕好可惜啊!

埋單可以用一張$40 coupon,Good。

食完嘢本來想去睇海洋劇場,但因為餐廳職員效率太低安排俾錢都等好耐搞到趕唔切,所以我地再去南極奇觀睇多陣企鵝,有一下突然之間成班企鵝跳晒落水四圍遊,好壯觀。

睇完企鵝我地就搭海洋列車返海濱樂園,今次是我們第一次坐車頭第一卡,睇唔到八爪魚弄破車頂玻璃的場面,是動畫唔同左定係每一卡畫面不一樣?

海濱樂園的目標當然是威威天地。

逸逸第一樣看中的就是幻彩旋轉馬(逸逸稱之為轉轉馬),107cm高以下小朋友要成人在旁邊站著陪同,有爸爸陪伴,逸逸終於可以自己㨂坐邊隻。

下一個逸逸的選擇是彈彈屋,自從早前係泰國跳過一次之後,逸逸勇猛左好多,自己排隊,自己除鞋放落兜兜,自己爬入去跳跳跳。

不得不讚一下海洋公園這個彈彈屋的安排,因為是按照高度分組排隊,所以同場一齊跳的小朋友高度相約,競爭力也差不多,比較安全。

當然唔可以錯過遊樂場巨型森林了,條條滑梯都玩下都唔知幾過癮。

見到火車就兩眼發光

所以點都要玩埋砵砵火車頭,話說我們一路排隊一路食魷魚,排後面的小朋友一直眼甘甘咁望住,其實我有個衝動想請佢食。

我地又要趕去搭海洋列車去返高峰樂園,因為我地要去睇4:30pm開始的海洋劇場。

近年每場海洋劇場都好爆滿,開場前半小時到已經沒有好位置,睇返自己的遊記,原來對上一次欣賞海洋劇場已經是2012年的事了。相反,今次直至開場都無坐到一半人,遊客真的很少。

2012年仲覺得都是差不多的表演,不過看過千次萬次都仍然有趣;今次再看卻覺得故事性太弱,無以前咁精彩亦唔夠緊湊,聽說海鮮公園的最新規劃是取消海洋劇場,雖然因為是童年重要回憶的原故覺得有d可惜,但當表演不再吸引,再加埋保育的角度,這也許是一個正確的決定。

睇完表演又坐返登山纜車落海濱樂園,又係紅色纜車?點解同紅色纜車咁有緣既?

香港老大街已經亮了燈,好有氣氛。

明明逸逸話落嚟去海洋奇觀睇魚,點知經過環廻水世界就話想再玩轉轉魚。

雖然聖誕節已經過去,逸逸都話要影下聖誕燈飾。

已經唔夠時間去睇魚,決定走之前用埋個3張$40 coupons,其中一張俾逸逸係禮品店㨂一份禮物。滿以為她會㨂早上愛不釋手的海豚,點知㨂左粉紅色企鵝,唔通因為睇左好耐同埋見到佢滑倒覺得太搞笑?早幾日恆仔聽到逸逸同粉紅色企鵝講:我見到你係海洋公園跌親呀。

依隻粉紅色企鵝就抵了,原價$100,原來購物有72折,再減$40,只係俾$32就帶左粉紅色企鵝返屋企。

跟住用左一張coupon換了這杯$38的Animo特飲,其實我主要係貪個樽靚。飲品是用芒果木瓜奶和忌廉汽水調配,不喜歡汽水的逸逸不喜歡,卻很愛入面的芒果爆珠,因為調配這杯飲品用不盡一整罐忌廉,恆仔就比較喜歡罐入面剩下來的忌廉。

本來近年對海洋公園的表演都無乜期望,有舊同學知我去海洋公園提醒我7pm夢幻水都有表演,我都只係諗住睇到就睇,點知依個投影show超級靚,配合住噴水、噴火、激光以及煙霧,還有舞者的雜技,我們站的位置只看到噴水池的一角也覺得超級精彩。

逸逸坐係恆仔膊頭睇到入晒神

寫blog的今天想上網搵返個show叫咩名,點知淨係搵到話2020年1月10日開始有個叫做光影頌的新表演,但介紹內容睇落就係我係2019年12月30日睇個show,攪到我有D混亂添!

睇完show我地用埋最後一張coupon加十幾蚊食左一份炸雞薯條,今次先留意到原來夢幻水都旁邊的一排小食攤檔都幾多選擇。

走之前夢幻水都仲有一個hea hea地的噴水和噴火show,難怪要有新轉變,不過逸逸不理好醜,汁都撈埋先肯走。

今次海洋公園一日遊真係玩得好盡興,駕車往返,逸逸在去程睡了覺,大約10:40am到達海洋公園開始玩,中間不用睡午覺,玩到7:45pm先走,一上車又呼呼大睡,不用午睡時間真係好用好多。

Comments

comments

2 則迴響於《公司福利之海洋公園一日遊

  1. 我睇既時候就覺得奇怪,點解逸逸一直都唔駛瞓覺咁好精力既呢,同埋點解你哋玩到咁多嘢既呢?最後就解答到喇﹗
    我哋去時2-3pm兩個小朋友就開始冇電,所以次次都係係地鐵站嗰邊玩完威威天地同睇完亞洲動物天地就差唔多冇電~

    • 時間真係超級好用,所以點解元旦堂區旅行搭車出發去目的地時太嘈逸逸瞓唔到覺令我很懊惱

Rita 發表迴響 取消回覆

你的電子郵件位址並不會被公開。 必要欄位標記為 *