逸逸N班有一本類似成長誌的功課,最後一章有關暑假去沙灘玩的記錄,怕熱怕人多怕無位泊車的我們成個夏天都無帶逸逸去過沙灘,直至11月,才成就2019年的第一次沙灘行。
我地個西瓜帳幕都幾引人注目。
基本上係玩到瞓晒身
由頭到腳都係沙
好有少女Feel
今次沙灘行有d重點特別想記低:
- 如果唔落水,秋天去沙灘玩其實最舒服,唔會太熱。
- 我地帶左水果和薯片做小食,依家成為左逸逸沙灘行的指定餐單。
- 玩沙就要取水定形,我地個筒又細,今次個大本營SET得近水源,來回多幾次還可以;兩星期後再來坐左另一邊,結果取水條路好遠,連逸逸都話下次要坐返近水個邊。
- 原來黃金海岸沙灘只係得蹲廁,逸逸去到疴唔出,好彩佢無好急返屋企疴都ok,第二次再去唯有厚住面皮光顧黃金海岸酒店個廁所。
最近我鍾意去青山灣,雖然青山灣啲沙粗啲拮腳啲,但好在有個兒童遊樂場,幫佢哋整理乾淨可以放佢哋過去玩住先,大人可以再慢慢執埋啲嘢~跟住去三聖飲茶,一條龍行程~
青山灣泊車好貴,唔想貴就行好遠,所以我比較鍾意黃金泳灘,如果唔係就情願揀蝴蝶灣。