THREE DAYS ESCAPE TO DISNEY – DAY 2 – HAPPY TIME AT DISNEYLAND (上)

二零一九年十月十二日(星期六)

迪士尼早晨。

酒店的電視通常都有卡通頻道,去到迪士尼更加一定有迪士尼頻道,仲要有英文版、粵語版和國語版,好厲害。逸逸都幾鍾意睇DISNEY JUNIOR,屋企的MY TV SUPER其實都有,返屋企都可以開俾佢睇下。

今次無訂酒店早餐,我地一向最支持的好萊塢快餐廳正在休業中,結果去左影廠酒廊。

影廠酒廊基本上只有中式和西式各一款,每份$138:

中式早餐包括有是日粥品(南瓜粥)配叉燒炒麵、叉燒包及香片茶

歐陸早餐則包括有早餐包點配麥片、水果、橙汁及咖啡或茶

價錢雖貴,不過味道也真的不錯,而且份量之大,我們三個人SHARE兩份早餐,食晒之後飽到我食唔落午餐。

爸爸要返房辦事,我和逸逸在LOBBY消磨一下時間,首先睇下卡通片先,之後再去商店逛一下。

因為昨晚曾經同米妮攬攬,逸逸已經對米妮充滿感情,再次愛上米妮。

逸逸好喜歡這個水樽,昨日逛商店時已對它愛不釋手,今早起初見她不停的在店內跑來跑去轉左好多個圈,突然拎起這個水樽然後講左句:”終於搵到你喇~”,原來逸逸一直係度搵緊依個樽呀,不過其實之前兜圈時已經經過好幾次,只係眼大睇過龍……

我們由酒店駕車過去迪士尼樂園,非常方便。

今次迪士尼樂園真係好少人,要幾少遊人先可以有機會影到無人的噴水池?

話說早前透過公司買了四張迪士尼樂園的特價門票,6月的時候來了一次迪士尼用了兩張,正好今次用埋餘下的兩張門票。不過現在逸逸已經足3歲,到了要買兒童票的年齡,所以我們要先排隊買逸逸的入場券之後再進場。

入場的時候,我們前面有兩個應該是買了年票的媽媽帶住幾個小朋友入場,結果聽到兩個迪士尼職員在談論:依個小朋友(逸逸)都買左飛,你話俾我聽佢地個幾個小朋友未夠3歲?

逸逸個樣係比較BABY,反差亦可能相對較大,不過我望落去個幾個小朋友都應該真係大過逸逸……

城堡的擴建工程還未完成,下次再去應該就可以見到成品了。

我們的第一站,永遠都是恆仔和逸逸最愛的小小世界。

今次一路玩一路唱住世界真細小

我都係第一次留意到原來依個大鐘每逢00分及30分都會響及有公仔走出來。

下一站係去玩杯杯,每次玩杯杯都咁開心。

之後去玩轉轉馬,本來臨上去之前仲話要同媽媽騎一隻馬,經過多番鼓勵,終於有勇氣自己騎一隻馬了﹗

我都久違了可以自己騎一隻馬了,哈哈~

跟住去玩蜜糖杯,逸逸話其實有D驚喎,之後都唔想再玩。

小飛象一飛沖天,今次逸逸開始要求掌握控制權(向上向下的手掣)。

第一次睇米奇幻想曲(逸逸形容為唐老鴨好搞笑嗰個),剛剛戴上3D眼鏡仲好得戚同我地影相,結果見到D野飛埋身邊驚到震,睇到一半要除眼鏡同埋坐我大脾。睇完話:我地唔好再睇D咁驚既野,成為今次驚驚遊戲第一名。(上次係坐遮遮)

行過見到可以排隊同白雪公主影相,因為逸逸無乜耐性,我地一般都唔太願排隊;不過有個在排隊的小朋友在玩泡泡機,逸逸主動走埋去玩,如果唔係排開隊,我地又唔會容許逸逸逗留在一個位置玩泡泡玩咁耐。今次逸逸一邊同小朋友玩泡泡,仲要玩得超開心,我地又可以舒舒服服的排隊同白雪公主影相,WIN WIN。

云云迪士尼公主之中,我諗逸逸只識得ELSA同埋白雪公主,因為LET IT GO首歌以及我我給逸逸買的白雪公主T SHIRT,所以逸逸同白雪公主影相都唔會太抗拒。不過我估她認為公主只有白雪公主一個,因為ELSA個名無公主兩個字。

始終無時間WARM UP,唔抗拒合照,但也不會有像看到MINNIE時那小FANS的眼神,不過點都好過後來見到巴斯光年,直情立即調頭走。

經過探險世界的歷奇噴水池,我地兩母女係度玩下水先。

平日在屋企同逸逸講故事有提過森林河流之旅坐船船,今日特登再帶她坐一趟,還是第一次見普通話的隊伍無人……

我地出發喇~

對於一個3歲的小朋友黎講,原來森林河流之旅(象象噴水個船)係好驚嚇,最恐怖的就是臨尾的火,逸逸好驚,還記得1歲半的逸逸是完全沒有驚的反應。

所以驚可以因為年紀細唔知發生咩事所以不安好驚,亦都可以因為年紀大左識野多左知道有D野有危險所以變得恐懼。

之後我地去睇巡遊,真係遊人不多的關係,我地差不多開始才到也可以坐在梯級欣賞。

睇巡遊的逸逸看起來都有D緊張,逸逸話因為車車開得好快喎~

睇完遊行,逸逸問:”車車個米妮係咪尋日同我攬攬的米妮?”  我答:”係呀”  逸逸再問:”點解佢唔同衫既?”  我:”佢換左衫嘛,你都換左衫喇,尋日著裙今日著米奇米妮衫。”

就讓孩子暫時沉醉在MAGICAL WORLD吧﹗

睇完巡遊,係時候要逸逸瞓覺,我地又去左明日世界有冷氣的火箭餐廳。我唔肚餓,諗住俾逸逸瞓覺,所以恆仔本來淨係買一份炸雞籃套餐返黎自己食。點知逸逸唔願瞓,瓜分了他一件炸雞,又要特地出去再買果汁俾逸逸,亦因為咁,忙亂到我依個史官竟然無影食物相呢﹗

Comments

comments

發表迴響

你的電子郵件位址並不會被公開。 必要欄位標記為 *