台北親子+溫泉之旅 – DAY 1 – 遼寧街夜市JAP JAP JAP

二零一九年十一月七日(星期四)

我地今日出發去台灣旅行了!

今日上午逸逸還要返學,放學食少少野就返屋企拎行李出發去機場了。

難得不是早機不用趕時間,我們今次搭機場巴士去機場。

原來架巴士要兜晒大半個屯門先至上公路,結果用左1個小時15分鐘才到機場,逸逸都係巴士上面瞓左大半個鐘,一到站就醒。

現在機場正實施進出管制安排,只有持有將於24小時內有效離港機票或登機證,以及有效旅遊證件的真正乘客,方可進入客運大樓範圍。我們還是在這個安排實施後第一次到機場,只是簡單檢查登機證和Passport,整體來講都很順暢。

Bye Bye Dog Dog車,台灣見!

辦理好出境手續之後,我們就直接去中場客運廊的BITE & BITE with LINE FRIENDS,因為上次專登去朝聖,負責搵位的恆仔找到的位置,竟然是BITE & BITE with LINE FRIENDS旁邊的THE FLIGHT DECK RESTAURANT & BAR,因為他說這兒才會空位,所以我們沒能點有LINE FRIEND的餐點,今次要補返數。

今次人好少,我們甚至可以同Choco同桌,逸逸超級開心。果然真係大個女,平日老是要黏住爸爸媽媽的逸逸,今日為了要黏住Choco而肯自己坐一邊。

依家無論坐邊都可以點兩聞餐廳的食物,不過跟海岸城的LINE FRIENDS CAFE相比,食物外觀一D都唔吸引。

逸逸一邊食一邊不忘要摸摸Choco

食完嘢都出去同Brown打個招呼

我們今次繼續支持香港航空,價格相宜服務也不錯,希望佢可以捱到落去。

上飛機喇

今次只能安排到2+1的座位,所以我和逸逸坐窗口位,恆仔就同我地隔左條走廊。

坐飛機坐船的指定活動—玩夾夾同講英文,逸逸的英文又進步了不少,今次仲多左d一大段聽落口音似英文但完全唔知佢講乜的說話,好搞笑。

仲有睇卡通片,今次愛上了一部由三隻熊熊組成的卡通《We Bare Bears》,逸逸唔係咁鍾意戴耳筒,加上只有國語和英文的配音,所以可以講話係齋睇畫面都鍾意。

兒童餐是雞胸肉粟米包,拎走左個雞胸肉之後逸逸成份食晒;一般餐是腸仔包,咦,個menu好似同今年三月個次一樣喎。

要數依程飛機最大的成就,當然就是逸逸成功係飛機上面去廁所,仲要係主動話要去,叻叻。

落左機就過關拎行李換錢,其實都無乜特別,最特別的就是每次都唔記得駛唔駛填入境紙結果點都填左先,所以要特登記低:有網上簽證就唔駛填入境紙,希望下次再唔記得可以睇返依度就唔駛浪費時間填表。

我們直接搭的士來到今晚入住的酒店,位於南京復興站附近的台北馥華商旅 – 敦北館。

酒店給我們upgrade了有陽台的房間,非常好,不過下次真的不可以再訂一般的雙人床房了,真的快要擠不下三個人了。

酒店的地理位置不錯,除了鄰近捷運站之外,遼寧街夜市,甚至我們很愛的林東芳牛肉麵都是步行距離,所以我建議今天的晚餐先去夜市逛逛,唔啱食也可以去食牛肉麵。

首先要穿過民居小巷

竟然見到當年拍拖常去的十大書坊,香港的十大書坊早已絕跡江湖,好懷念啊!

來到遼寧街夜市,比想像中熱鬧得多,繞一圈已大慨決定了今晚要吃什麼。

第一件事是先買合逸逸口味的晚餐,首選當然是牛肉麵,這兒有一家創立於1955年的潘家老牌牛肉麵。麵條可選闊麵還是幼麵,湯底可選紅燒還是清燉,整體來講也OK,就是不及林東芳惹味,不過最緊要逸逸鍾意就可以了。

另一家又是超過40年的老店勝利號蚵仔煎,蚵仔煎是意想不到的好味道,除了蛋和地瓜粉的比例以及蚵仔的份量都恰到好處之外,最有驚喜的是加了通菜,本來有點黏的蚵仔煎加上爽口的通菜,真係好正。

等蚵仔煎的時候,見到隔離的格登炸雞好多人排隊,我又買一份,即炸熱辣辣一定好食既,不過又唔係好食到飛起個種。

好想食台式糖水,隨便在一家名為紅心粉圓老店買了一碗花生湯+芋圓,原來又是一家超過四十年的老店。花生湯清甜,芋圓軟糯不黐牙,好味道。

我地仲買左一人一杯鮮果汁,兩杯西瓜汁+一杯木瓜牛奶,雖然沒有白玉苦瓜汁,有鮮榨果汁已經比用顏色粉調配的台式飲品好得多了。

我地買好晒食物回酒店舒舒服服咁慢慢食,逸逸本來眼瞓扭計要我餵,結果因為太好食的原故等不及,自己拿起叉子吃起來,仲要食到瞇瞇眼。

我問逸逸:「麵麵、炸雞定西瓜汁最好味?」逸逸答:「全部都好食,我食左好多。」我想講,最後她自己飲晒成杯西瓜汁。

食完嘢成個生猛晒

Comments

comments

3 則迴響於《台北親子+溫泉之旅 – DAY 1 – 遼寧街夜市JAP JAP JAP

  1. 講起逸逸自己同choco坐,呢排如果我哋四個去餐廳坐卡位,都會我同day坐,曉同詩兩個坐,唔知點解佢哋兩個小朋友自己坐會食得乖啲同快啲﹗兩個其實都爭住黐媽媽,兩個都公平地冇得黐就少啲心理障礙~
    去台灣一定係住兩張雙人床既家庭房﹗yeah~仲要兩張床拍埋一齊,可以無窮無盡咁碌嚟碌去~
    逸逸既potential真係難以估計,曉曉表姐即使幾鍾意,而家四歲大半都冇可能自己飲晒一杯果汁﹗﹗

    • 兩個公平地無得黐住媽媽,好似好可憐咁~
      我通常book twins room,保證夠瞓,不過我都想黐住恆仔
      佢飲得完杯西瓜汁都嚇了我一跳,佢未試過飲咁多

Catherine 發表迴響 取消回覆

你的電子郵件位址並不會被公開。 必要欄位標記為 *