瞓醒覺我地就出動去食恆仔的BIRTHDAY DINNER。
出發之前問恆仔生日飯想食乜，佢話只想食得舒服，屋企有小朋友的一定明白依個係一個好高的要求，所以我就決定去食恆仔一向都好鍾意的自助餐，至於食得舒唔舒服，就要睇逸逸的造化了。
早兩星期剛訂好酒店時已經上網CHECK過澳門最火紅GRAND HYATT的Mezza9以及可以睇到燈光音樂噴泉SHOW永利皇宮的咖啡苑都已經FULLY BOOKED，今次決定試下JW萬豪的URBAN KITCHEN。
我地先搭酒店SHUTTLE BUS去碼頭，再轉GALAXY的免費專車去JW萬豪酒店。
前面的小朋友在看冰雪奇緣，吸引住逸逸的目光。
好靚的大堂吊飾
我們沒有BOOK枱，不過食客唔算好多，WALK IN也可以立即安排到不錯的位置。
URBAN KITCHEN頭盤的食物選擇很多，調味也很有心思。
刺身也不錯，特別是那蝦刺身，鮮甜肥美，反而平日我很喜歡的龍蝦食落無乜味，兩款生蠔肉質也略為單薄，沒有令我想再ENCORE的欲望。
依度另一吸引人之處就是海鮮冷盤COUNTER旁放左一條中型吞拿魚，而7PM就舉行即劏吞拿魚的表演。
可惜該時段逸逸正好要辦大事，再出去條吞拿魚已經變成依個狀態。
睇唔到都可以試下味，係幾好食。
燒味檔有廚師即包的北京烤鴨，好味道！
燒牛扒好滑肉味好濃，連負責切扒的廚師都讚話係靚牛，不過恆仔覺得略為生了一點；炆牛尾又淋又滑，正；另外燒豬仔骨都很不錯。
鮑魚海鮮湯飯一般，但泰式炒蟶子同埋上湯浸大蜆就好正。
原來星期五是以海鮮做主題，超過七成食物是海鮮，對於海鮮控如我當然非常啱食，但係壽星仔恆仔其實對於海鮮很一般，其實我覺得有d對唔住佢。
連小漢堡的餡料也是炸魚，難得平日唔太好食魚的逸逸自己食晒成個漢堡，成餐飯都坐定定乖乖食，同我地出去揀食物又好聽話無周圍走，依餐自助餐大家都食得好舒服，算是滿足了恆仔的要求。
甜品款食都好多，樣樣都好食，逸逸依個馬卡龍控又可以大快朵頤，食到連雪糕都食唔落。
飲品也很有特色，除了果汁之外，還可以自製MOCKTAIL。
食飽飽又可以嘆番杯港式奶茶，正!
即時入會仲有9折優惠，荃灣熊貓酒店自助餐的價錢食JW MARRIOTT的自助餐，去澳門真係點可以唔食自助餐？
影依一張相一D都唔簡單，企係度逸逸係唔夠高伸個頭出來，所以是坐在我的大脾然後我要再伸個頭去另一邊，先至有咁靚的效果。
我地係GALAXY行下，有好多熊熊可以影相。
經過見到GRACE KELLY的展覽，我同恆仔講我地同佢好熟，不如入去睇下。我地同GRACE KELLY有幾熟？GRACE KELLY是一個嫁左去摩納哥做皇妃的荷理活明星，我們看過由妮歌潔曼主演有關GRACE KELLY的電影<<摩納哥王妃>>，又參觀過她的家摩納哥親王宮，仲親眼見過曾經在1956年時接載剛由美國來到摩納哥預備下嫁雷尼爾親王的GRACE KELLY的車，你話係咪好熟？
不過因為我唔太熟悉名牌，所以睇完今次的展覽先知道，原來HERMES的KELLY BAG有一段故事，因為當時已有身孕的GRACE KELLY用HERMES鱷魚手袋遮掩腹部被登上雜誌，令這個手袋一舉成名，甚至被命名為KELLY BAG。
依度就係摩納哥親王宮了，好懷念四年前的法國之旅呢！
沿路經過不同的雕塑
逸逸都擺晒POSE叫我地幫佢影相
我們在鑽石大堂遇上30分鐘一次的運財銀鑽表演，其實是運用水簾、音樂和燈光效果的表演，期間會有大鑽石走出來，完結後有如將鑽石變走。
恆仔跟逸逸說寶石唔見左，逸逸答因爲完喇嘛，成個小大人，真係乜嘢都知道。
之後我地就搭番免費車返酒店休息了。