一人價錢五人同遊海洋公園

今次海洋公園之旅其實來得幾即興及隨心。

大約在一月中的一個晚上收到HKTVMALL的宣傳電郵,海洋公園門票五折優惠,遊園日至二月尾,本著價錢這麼便宜隨便找個週末帶免費入場的逸逸去海洋公園逛逛也不錯,也沒有和恆仔商量就立即買了票。後來問同樣入園免費的爸爸媽媽有沒有興趣同行,結果只是買了兩張五折的門票,就讓我們五個人一起在海洋公園度過了愉快的一天。

因為想逸逸可以去程和回程都小睡一下,所以我們今次直接駕車去海洋公園,原來現海洋公園推出網上車位預約服務,只要在出發前一天或以前在網頁上面預約並繳付$50訂金,就可以確認車位,免卻我們當年一場來到海洋公園卻因為沒有泊車位而被迫打道回府。

遊園日是在農曆年初五,遊人超級多,出發前已有同事說他爸爸帶孫兒在年初二去海洋公園多人到乜都玩唔到,所以我們已有心理準備,隨心而玩。

我們大約11AM到達海洋公園,第一站首先去逛香港賽馬會四川奇珍館,我們排隊的時候有一個職員不停的向排隊的遊人說要看熊貓可以選擇對面的熊貓館,那兒不用排隊,不過我們見隊伍也沒有好長,所以繼續排隊,後來才發現原來我還是第一次參觀這個香港賽馬會四川奇珍館呢﹗

海洋公園入面有兩個可以看熊貓的地方,一個是可以看大熊貓和小熊貓的大熊貓之旅,以及今次我們參觀的可以看到大熊貓以及金絲猴的香港賽馬會四川奇珍館。金絲猴非常活躍,逸逸看到金絲猴爸爸、金絲猴媽媽同埋金絲猴BB,話好似爸爸媽媽逸逸咁樣。另外,我們參觀的時候,大熊貓樂樂正在吃竹葉,我們也看了很長的時間。

因為唔想排長龍坐登山纜車,所以我們先乘搭載客量龐大的海洋列車去高峰樂園,雖然好多時話坐海洋列車是為左快而少左樂趣,但對於逸逸來說,海洋列車入面的動畫已足以讓她看得入迷。

一上到高峰樂園就立即去坐登山纜車返回海濱樂園,完全不用排隊,YEAH~

逸逸係香港老大街擺檔賣菜

 

我地係電車前面偶遇麥兜,同佢影番張相喇,不過逸逸其實好驚佢……

見到香港老大街入面的詠藜園對出難得剛剛有位,決定在這兒吃午餐。爸爸媽媽不單免費入場,還附送餐飲現金券,享用買一送一優惠,所以雖然園內食物錢昂貴,不過我們這頓午餐吃得很便宜,不過最大的的問題是難吃。明明詠藜園是一家在香港頗有名氣的店家,點解可以在主題公園做壞自己個名?

逸逸愛上了香港老大街入面的電話亭,入左去唔肯出番黎。

我地係依度見到一隻鸚鵡,佢識得同人打招呼架。

我地同左隻雕鴞影相,原來雕鴞眼珠唔識轉,但係佢條頸可以轉270度架。

下一站我們去看雀鳥劇場,逸逸再三要婆婆保證,雀雀唔會飛去逸逸度,明顯逸逸真係好驚雀雀會飛過來。

臨尾又想同鸚鵡影相,埋去又想逃走,好糾結。

今次沒有去排長龍的環迴水世界,而是威威天地的幻彩旋轉馬,完全唔駛排隊,GOOD﹗

農曆新年可以同財神合照,祝大家財源滾滾來。

之後我地去左睇SHOW,叫做:麥兜‧出走的魚蛋,入面講魚蛋弟弟及一眾食材角色立志成為美食,卻不幸落入麥太麥兜手中,計劃出走的食物漸漸發現這對母子雖不懂美食,卻每天透過美食傳遞彼此關懷。成個音樂劇場嘅內容都都風趣、幽默,歌詞改得超好笑,大人細路都睇得好開心。

睇完SHOW就返去威威天地玩砵砵火車頭

我地係威威天地遇上海豚樽樽,你睇下逸逸幾驚﹗

午餐食得麻麻地,我地食左雪糕同窩夫當下午茶,好味道。

食完TEA就去威威劇場睇SHOW,劇目是威威列車奇遇,內容大約是由海洋公園的吉祥物威威司領、海豚樽樽、鯊魚大嘜、小熊貓小紅熊、企鵝德仔、熊貓包包同埋雪狐美雪一齊乘搭威威列車去七大洲探險。對大人黎講其實有D悶又有D老土,同麥兜‧出走的魚蛋的質素相距好遠,不過逸逸睇得開心就夠喇,她最興奮應該是模擬落雪的部份,仲話落雪雪,婆婆成頭都係。

我地又返去搵番剛才識同我地打招呼的鸚鵡,點知佢今次唔睬我地,仲突然轉身背向我地,原來佢要疴屎,過左好一段日子,逸逸不時都會突然講雀雀唔睬逸逸、婆婆同公公,因為要疴屎。

睇完SHOW我地又搭登山纜車去高峰樂園,又係唔駛點排隊。

逸逸玩左大半日,是時候要強制睡覺,我和一家三口去左灣景餐廳讓逸逸睡覺,爸爸媽媽就可以再高峰樂園逛一下。本來我諗住係灣景餐廳應該是可以一邊欣賞靚海景一邊嘆杯咖啡,點知灣景餐廳正值裝修BLOCK晒D VIEW,仲要無咖啡賣,明明上次我都係度同逸逸午睡埋飲咖啡。

瞓醒覺我地去排摩天輪睇夜景,明明睇APPS話排15分鐘,結果排左超過30分鐘,成為今次入黎海洋公園排隊排得最耐的設施。

晚上的海洋公園好大風,摩天輪搖得好厲害,我們旁邊車卡有兩位女士驚到攬住中間條柱,好搞笑。

憑入場門票可以在海洋公園的APPS入面抽獎,其中我們抽到攤位遊戲券,雖然嬴唔到獎品,不過免費玩下都唔錯。

最後我地衝埋去南極奇觀去睇企鵝,不過可以已經入夜,大部份企鵝都已經瞓覺了。不過仲有幾隻未瞓的企鵝,我地話好似詩詩行路咁,逸逸又係度學詩詩企鵝行路。

最後我地坐番海洋列車返回海濱樂園,晚上遊人很少,坐得舒服得多,今次坐足兩程海洋列車,才驚覺原來兩程的影像是不同的。

我地玩到8PM先走,臨走之前轉埋個風車先喇~

Comments

comments

發表迴響

你的電子郵件位址並不會被公開。 必要欄位標記為 *