二零一九年三月二十九日(星期五)

我地出發喇~

今早我們乘搭9:05AM的航班，即是7AM要到機場，時間實在太早，我們決定直接坐的士去機場了。我們一向都沒有帶BB車去旅行的習慣，以前逸逸年紀還小我通常是用揹帶抱住她，當她是一件重型行李就去邊都輕輕鬆鬆，今次是第一次沒有帶揹帶去旅行，對大家都絕對是一個大挑戰來的。

雖然逸逸已經不是INFANT，但原來帶著小孩仍然可以享用香港航空的禮遇通道，真好。逸逸要與她喜愛的DOG DOG車分離，依依不捨，我地台灣再見喇~

CHECK IN後我們先去食早餐，之前提過香港國際機場有一個叫做”市區價格保障”的機制，保證機場貨價不高於該零售商的市區分店，不過你有張良計我有過場梯，翠華機場店的早餐SET看起來跟平日市區分店的差不多，不過炒蛋就變左櫻花蝦炒蛋，素鮑魚火腿絲通粉就變左帶子火腿粒通粉，立即賣貴十元八塊，唉，最慘係食物劃蛇添足，無原來的咁好食嘛~最可恨的是我平日最愛的雪菜肉絲蝦米米粉變左酸菜豚肉湯米粉，哼哼……

本來諗住咁早逸逸唔會食早餐，點知又爬左起身食左大半碗通粉喎~

之後辦理出境手續，今次無得行禮遇通道了，我們問過只係攜同兩歲以下嬰兒才合資格使用。

去機場例牌要入去DISNEY STORE逛一下，近日逸逸透過佢沖涼個條TSUM TSUM大毛巾認識左好多迪士尼朋友仔，爸爸同佢係DISNEY STORE認人認得好忙碌。

今次繼續係中場客運廊登機登機，要乘搭無人駕駛的列車，最近逸逸迷上了小火車迪迪寶，無人駕駛的列車前面的大玻璃可以看到列車在路軌上行走，看得逸逸著了迷。

HELLO飛機~

因為食早餐的時候爸爸太想飲檸檬茶媽媽太想飲咖啡，所以沒有預備逸逸的飲品，應承左出去會再買果汁俾佢，於是我們在中場客運廊找尋啱逸逸飲的飲品，結果周圍影左唔少相。

平日零食物語有果汁架喎~依間無，不過有逸逸最近才認識的電車，好興奮，但係逸逸話依架電車無得坐。

上次我地食過的BITE & BITE with LINE FRIENDS會唔會有樽裝果汁賣呀？又無喎。

好彩最後恆仔係暗角位搵到間美心MX，終於買到逸逸的橙汁。

今日飛機DELAY了大半個鐘，中間又突然改了登機閘口，不過好彩都係附近唔算行太遠。來到登機閘口才發現原來有STARBUCKS，早知係度買果汁喇~所以最後我買左杯LATTE。(唔知關咩事)

上機喇~逸逸依排影相叫親佢望鏡頭就擰開，所以大家請留意恆仔隻手……

對於逸逸黎講，坐飛機的指定動作就是要睇米奇。不過因為今天實在太早起身，所以好快就瞓左覺了。

至於我，因為逸逸瞓左覺的關係，我竟然可以差不多完成左一套超級經典的電影，就是逃學威龍。點解佢係經典？因為這是一套1991年上影的電影，而且仲要已經唔止睇過一次，但係28年後的今天再睇，竟然仍然可以由頭笑到落尾。

飛機餐是包包，一般餐是港式腸仔包，兒童餐是雞胸肉包。因為上餐時逸逸瞓左覺，我和恆仔瓜分了逸逸的雞胸肉包，留番個包裝比較企理的腸仔包俾逸逸瞓醒之後享用，一如所料，逸逸淨係食包唔食腸仔。

飛機餐只供應清水，但對於逸逸來說搭飛機另外一個重點就是飲橙汁，所以我特地請空姐俾左杯橙汁我，裝橙汁個杯好靚，充滿香港特色，仲俾逸逸發現到上面有電車圖案添﹗

順利去到台灣桃園國際機場，過關領行李換錢都沒有什麼特別，最特別的是同機竟然有乘客的行李箱和我們一模一樣，我要費一番唇舌向逸逸解釋點解那個不是我們的DOG DOG車。

我們直接從機場搭的士到今晚入住的福容大飯店-桃園，寄存好行李就又再搭的士出發去食午餐了。

今日吃午餐的地方是恆仔在三年前為我挑選的NINI尼尼義大利餐廳(南崁店)。

NINI尼尼義大利餐樓底很高，環境好舒服，不過亦因為室內夠晒空曠，所以輕聲說話聲音也變得很大，嘈吵了一點。

其實因為食左兩次早餐的關係，我們也不太肚餓，所以點了一個套餐加單點一客意粉。

暖烘烘餐包

質素一般的餐湯

恆仔話睇FACEBOOK見到依度D扒好靚，所以我地要試下。我地點左美國安格斯玫瑰肋眼牛扒，個樣果然好靚，食落都唔錯，不過價錢也不便宜就是了。牛扒是依重量計價，我們這一份就要差不多NT$1000，以台灣的物價來計，更加昂貴。

反而我們點了餐廳TOP 10餐牌上的燻雞奶油義大利麵更有驚喜，切了薄片的燻雞口感很特別，跟我們平日吃的雞肉有點不同，意粉煮得彈牙，汁料也香而不膩，最重要的是價格便宜，只售NT$210，性價比實在比牛扒強得多。

套餐包一杯普通飲品，恆仔要了可樂，我就另外單點一杯果汁跟逸逸分享。依杯果汁特飲叫做紫莓饗宴，入面有橙、藍莓、小紅莓、菠蘿同埋奇異果，不過我同逸逸都覺得麻麻地。

套餐只包一份甜品，是美味的焦糖燉蛋，因為剛巧廚房多出了一份甜品，所以餐廳就多送一份給我們，謝謝。

其實整個午餐時間逸逸都在睡覺，睡醒了心情也不好不願吃東西，我帶了她出去外面花園逛了一下調整心情，出去睇完水水同埋同雀雀吱吱吱咁傾左一陣計之後，心情好番好多，才勉強食左少少我們留給她的意粉。

食完午餐就回酒店，原來在桃園找的士比想像中難得多，特別是來到NINI尼尼義大利餐依D鄉郊地區，結果最後返回餐廳請餐廳代CALL的士才成功回到酒店，亦因而浪費了不少時間。

返到酒店夠鐘可以上房，我們回房間上個廁所洗個臉，就再次出發去下一個行程了。

Comments

comments