因為生日免費入場的關係，差不多每年恆仔的生日我們都會去海洋公園慶祝，依家同行者還有正價門票85折優惠，加埋逸逸免費入場，更加抵玩。
去年來的時候淨係買飛都排左40分鐘，逸逸等入場等到眼瞓，所以今年情願晚點出發，坐南港島線搭多兩個站先去鴨脷洲食午餐。
我們在沒有備課的情況下，光顧了鴨脷洲熟食市場入面的陳新記。看起來有點歷史的店面，當然要點最重要有鑊氣的炒粉麵，經典的乾炒牛河同埋肉絲炒麵都非常有水準，逸逸話脆脆麵好搞笑喎~
食完午餐我地就入海洋公園玩喇~
第一個節目係海洋版MERRY GO ROUND環迴水世界。
一年前未夠一歲的逸逸只可以坐廂座，今年大個女可以同媽媽坐雙人座位喇！逸逸對這個玩意是既緊張又期待。
海洋公園攝影師幫我地影左依張靚靚全家福，加埋七彩繽紛的海洋公園相架，逸逸見到愛不釋手，唔買都唔得喇！
我地排隊搭纜車去高峰樂園
逸逸對於坐纜車非常興奮，猛咁話飛飛，而且仲記起我地上星期係澳門的永利皇宮的紅色纜車呢！最搞笑的是她一邊坐一邊講：好玩呀⋯⋯好慢呀⋯⋯
恆仔生日，點可以唔去熱帶雨林探險徑探侏狨？我地仲係度睇左龜龜食蘿蔔同埋魚魚瞓覺。
下一站去睇我最鍾意的企鵝，逸逸一見到門外的傘就講遮太陽伯伯。
我地來到企鵝館的時候企鵝剛剛食完野，好活躍呀﹗
係岸邊排排企，然後個別企鵝突然跳落水，好可愛
本來逸逸睇得興致勃勃，點知突然有個導賞員叔叔走埋黎同我地講解點樣辨認館內的三種企鵝 – 紅嘴的巴布亞企鵝、黃頸的國王企鵝以及頭上有毛的南跳岩企鵝，逸逸就開始有點不安，沒多久就嚷著要走。
出到去之後，又話要返入去睇企鵝，我們打算找個僻靜的位置慢慢欣賞，點知今次輪到導賞員姐姐，可能見到我地帶住小朋友，特別想同我地介絕掛。
之後我地去埋隔離雪孤居睇北極狐，白雪雪好靚，而且身手好敏捷。
我地去北極之旅睇斑海豹的時候，剛剛遇上海象的餵食時間，不過人頭湧湧都唔係太睇到，而且逸逸已經好眼瞓。
於是我地決定去搵個地方坐低俾逸逸午睡，要價錢不貴坐得舒服又有冷氣，非灣景餐廳莫屬。我們差不多行到去餐廳，逸逸話要抱，我話就快到喇，鼓勵逸逸自己行埋佢。行到餐廳入口，仲要落一條長樓梯，我稱讚逸逸：”好犀利喎，一直堅持到自己行。”逸逸回應：”我想奶奶嘛~”
原來如此，奶奶的魔力真大。
於是逸逸奶奶同午睡的時間，就成為左我同恆仔二人世界的時間。
逸逸差不多瞓左一個半小時，瞓醒時候已經唔早，我地又去排隊搭纜車番落海濱樂園。
點解我地同紅色纜車咁有緣既？
依個時候掛起左一號風球，坐係纜車上面真係好大風~
不過逸逸一D都唔驚，而且繼續非常ENJOY。
亮燈後的夢幻水都人工湖好靚~
我地去左海洋奇觀睇魚魚，早上來的時候要大排長龍，晚上才參觀悠閒得多。逸逸見到魚魚都OK興奮，特別係去到最尾大魚缸的位置，主動要我和恆仔一齊坐低係地下睇魚。
睇完魚，我地預備出去欣賞7:45PM舉行的加勒比夏夜巡遊，不過因為天氣影響有點DELAY。
海洋公園的巡遊真係同迪士尼差好遠，巡遊於8:00PM宣佈開始，但站在公園入口位置(即巡遊路線尾站)的我們由8:00PM至8:10PM除了開頭有一段音樂之外，基本上是寂靜的，終於行到過來又無乜隊型，好快就叫小朋友一齊跳舞，然後快速的在水池上噴火以及放幾發煙花就完場，感覺是等了很久然後草草收場，有點浪費時間。
不過最大的好處就是我們發現到逸逸原來驚煙花的嘭嘭聲，暫時似乎睇煙花未係逸逸ENJOY的節目。
後記：
逸逸在第二天同褓母姨姨分享她在海洋公園的見聞：
- 爸爸媽媽同逸逸一齊楂紅色車車 (其實係坐紅色纜車)
- 魚魚瞓覺(我地真係見到魚魚瞓覺，仲話俾逸逸知魚魚張開眼睛瞓覺)
- 威威爬(估計是龜龜爬)
姨姨問逸逸有無睇熊貓，逸逸都準確咁話俾姨姨知我地無睇到熊貓架。