我二十二個月大了﹗

今個月我同公公婆婆同埋暐姨姨一家一齊去左9日韓國旅行，由朝到晚都同曉曉表姐同埋詩詩表妹一齊，我開始享受同其他小朋友一齊玩既時間，一齊跑一齊跳一齊笑好開心，昨晚係公公婆婆屋企我仲主動邀請表姐一齊睇ABC添﹗去旅行真係好開心，除左可以由朝到晚黏住爸爸媽媽之外，仲有好多新奇好玩既野，你地千祈唔好話咁細個去旅行邊度有印象，我記得我(係樂天世界)有楂過車車，仲記得我楂的是橙色車車，暐姨姨楂的是紫色車車。

我依家勇敢左好多，今次去韓國的時候，係首爾路7017有一個跳彈床的地方，每次只可以一個人入去，見到表姐入去玩我都好想玩，最後成功係無爸爸媽媽的陪同下自己入去跳跳跳，雖然只係好短時間，但係真係需要無比勇氣。另外，依家室內的短滑梯，無梯級我都可以手腳並用自己爬上去自己SIR落黎，仲有一樣野唔可以唔提的成就，不過暫時只係試過一次，就係我成功咁係加平民宿的床上面打到前滾翻，你地話我係咪好犀利呢？依D全部都係今次去韓國旅行的成就黎架﹗

我好鍾意玩水水，只要見到游水片片已經知道要預備埋我的游水三寶：泳衣、水泡同埋青蛙仔毛巾衣。依家我已經對個水泡操控自如，自己想去邊就去邊，我期待住每個有太陽伯伯的週末。

我依家識得唱幾首歌喇，暫時最完整係唱太陽叔叔(明明係太陽伯伯)，另外”ABC”同埋”TWINKLE TWINKLE LITTLE STAR”都學得差不多，去到聖堂我都會跟住人地唱亞利路亞，另外，有時我都會學婆婆唸”打仔仔賣魚魚”又或者”行到街邊執個橙”。總之爸爸媽媽就話我唔停口喇~

Comments

comments