我二十一個月大了！
我大個女喇，我依家除左係詩詩表妹的逸逸表姐之外，我仲係屋企的熊熊、BB、兔兔的逸逸姐姐，我會抱抱佢地，同佢地一齊睇書書、踢波波、仲有食蛋糕添！
最近我鍾意係屋企睇小朋友（snoopy卡通），睇叔叔玩水水（Running Man玩水環節）都OK，又鍾意係婆婆屋企睇ABC（ABC Video)，不過爸爸媽媽話一日只可以睇一次，我都乖乖遵守承諾。今個月開始，爸爸媽媽成日話要睇叔叔玩波波（世界盃），雖然叔叔個波波同龍門同我的一樣我好開心，但係我成日都搵唔到叔叔個波波囉。
我依家學識左各式各樣的交通工具，去街就更加有趣，周圍都見到巴士、小巴、的士、貨車、輕鐵同埋西鐵，仲有唔同顏色，平日除左坐爸爸車車之外，通常都係搭輕鐵、西鐵、巴士同小巴，所以有一次爸爸同我搭的士，我興奮左幾日呀！
我好鍾意同人傾計，傾到褓母姨姨聲都沙埋，我會話俾褓母姨姨知婆婆有天娜姨姨，我又會話俾媽媽知姨姨屋企有單車，所以如果有咩係秘密，千祈唔好話俾我知。
