我二十個月大了﹗
夏天又來了，我又可以去玩水水喇~今個月舉行左2018年的下水禮，單單是這兩星期我地已經去過兩次泳池一次沙灘玩水了，好開心呀﹗我好鍾意件泳衣，又好鍾意個新水泡，一見到佢地同時出現就知道又可以玩水了。
我依家同爸爸媽媽溝通越來越順暢，基本上都唔再用BB話了，所以唔好再叫我翻譯詩詩表妹講乜野喇；我依家會主動表達自己，肚餓、飽飽、靚靚、鍾意、唔鍾意都會開聲講，最近我成日同爸爸媽媽講：”逸逸鍾意單車”，佢地個樣好似好苦惱咁，我都係想將我既想法話俾佢地知者。
最近我地甚至會討論問題，有一次我和爸爸媽媽在輕鐵上討論著左鞋之後有無腳腳的問題，我認為睇唔到腳腳就是無腳腳，但爸爸媽媽又堅持有，旁邊有個不認識的叔叔一邊聽我地討論一邊笑，究竟有咩咁好笑？仲有呀，我依家知道爸爸、媽媽同埋我自己的全名，依家開始學緊自己的英文名，另外，經過一番訓練之後，我終於搞清楚”你”同”我”的用法，真係有D複雜。
我認識既野多左，依家除左數字同埋部份英文字母之外，又會認得各種交通工具同埋唔同的顏色，而且我發現好多係街上見到的事件都會係電視上面見到，所以我越來越感受到睇電視的樂趣。不過大家可以放心，我唔係電視迷黎既，只是偶然在電視上面發現到熟悉的事物就會好開心，仲會即刻話俾爸爸媽媽聽。
依家我記性越來越好，我會記得之前一晚係婆婆屋企食過什麼食物，可以講番俾爸爸媽媽知；搭西鐵見到哈哈笑(關愛座)會諗起同婆婆去迪士尼玩的細節；見到屋企的星星汽球會記得是曉曉表姐俾我的；我會記得去聖堂的路，爸爸媽媽行左去第二邊我會出聲架。
我仍然好鍾意聽音樂同埋跳舞，電視上面有人唱歌跳舞的話，我會即刻跟住跳。我都好鍾意唱歌架，不過除左聖誕歌可以跟到少少之外，都唔係太識唱大人唱緊既歌，所以我情願唱番我的自創作品比較好，下次唱俾你地聽呀﹗
