2017-12-30 我十五個月大了﹗(1Y3M0D)

我十五個月大了﹗

今個月我又有好多新體驗,第一次去台灣、第一次去動物園、第一次玩波波池、第一次打鞦韆、仲有第一次入戲院睇戲添﹗

我依家得出街搭車識幫爸爸媽媽”DO”八達通;我知道暐姨姨個肚入面有BB,仲會好溫柔咁摸摸;我會坐定定安安靜靜的讓爸爸幫我剪指甲;依家如果爸爸戴帽帽我都肯一齊戴帽帽;其實我對自己個LOOK好有要求,會自己揀鞋,最好要同爸爸媽媽一樣,我仲會幫媽媽揀埋鞋添,不過有時我幫佢揀左對波鞋佢話番工唔著得喎。

食野方面,最鐘意既繼續係湯湯、麵麵、肉肉、提子同埋蛋糕,排名先後日日都唔同;我開始會自己用手拎野黎食,係大人既幫助下用叉都用得唔錯,不過用湯匙就成日倒晒食物落地下,飲野會自己雙手捧住個杯自己飲,不過一唔專心就會倒瀉。依家我認得檸檬水,是在餐廳爸爸媽媽會分俾我既飲品,仲有紅豆冰都食到我LAM LAM脷,至於個杯啡色叫咖啡的東西,媽媽話no no no喎~不過,我最愛仍然是媽媽奶奶。

我好鐘意同婆婆玩,會要求同佢玩”排”(即係排排坐),或者”點”(即係點蟲蟲),有時會遞隻腳俾佢(即係玩打仔仔),好開心,我會主動拎小椅子去俾婆婆叫婆婆”坐”,婆婆生日我仲同左婆婆講”HAPPY BIRTHDAY”添呀﹗

依個聖誕節我好開心呀,周圍都有靚靚(聖誕)”樹樹”同埋”燈燈”,平台又有”星星”,升降機入面有”鹿鹿”,周圍都好”靚靚”。仲有收到好多聖誕禮物,最鐘意的一定是爺爺送既媽媽幫我揀的彈彈馬,我每日都要彈彈彈架﹗

爸爸媽媽話我對於D唔駛負責任的關係好開放喎,周圍同D陌生人SOCIAL,HELLO、BYE BYE、笑笑全部做到足,反而親戚朋友就要熱身,所以,如果我見到你地而向後縮的話,千祈唔好唔開心,因為咁樣代表我認得你呀,而且玩落就可以同你好FRIEND架喇~

Comments

comments

發表迴響

你的電子郵件位址並不會被公開。 必要欄位標記為 *