二零一七年十一月十二日(星期日)
經過一晚的休息，我地又準備出發去玩囉~
平日在家我通常都在洗手間梳好頭才出來，今天因為沒有拿梳進洗手間，所以逸逸可能是第一次看到我梳頭，結果一手就搶左我把梳學我梳頭，小朋友，你咁少頭髮駛乜梳呀，哈哈。
梳洗之後就去吃早餐，點知恆仔發現漏左野要番房拎，我同逸逸係LOBBY睇下卡通片先。期間有個著住公主裙的小女孩也有過來看卡通，逸逸眼甘甘咁望住姐姐。
本來有諗過好唔好去米奇廚師餐廳食BREAKFAST BUFFET，可以跟廚師米奇合照，但經過時看到原來要跟廚師米奇合照是要大排長龍，完全無當年同迪士尼朋友一齊食早餐的氣氛，這些錢感覺上唔值得花。
所以最後我地又去番好萊塢快餐店吃早餐，我的雞扒烏冬唔錯，恆仔的西式早餐都正常口味，價錢當然是極不合理，不過早餐都要食架喇~
逸逸好努力咁食烏冬，之後又食左我同恆仔都麻麻地但她超級喜歡的乳酪。
依家食野的PATTERN都係我先餵逸逸，恆仔努力快D食，之後佢帶走逸逸玩，我再安心進餐。逸逸帶住恆仔周圍行時，櫃位有個廚師主動問逸逸食飽未，又送貼紙俾逸逸，估唔到原來迪士尼入面連廚師都會隨時送貼紙的。
食完早餐，逸逸自動帶左我地入去餐廳隔離的PLAYROOM馬里布遊戲室，入面俾小小朋友的地方比較細，但放左較適合青少年的AIR HOCKEY、推糖機等等，逸逸仲係度觀察緊之際，恆仔突然聽到有個國語人接完個電話之後就叫PLAYROOM內的孩子話可以同高飛影相，於是我地又八掛去搵下，我笑說識得兩文三語真係好重要。
原來影廠酒廊正在舉行高飛早晨影院活動，不過眼見睇電影的人不多，大家主要目的都是跟高飛拍照。
經過昨天史迪仔一役，我地都唔敢咁進取讓逸逸跟高飛接觸，逸逸果然是有點緊張，但沒有哭，高飛又好識做自己遠望逸逸一點，所以影到依張靚靚家庭照。影完相之後逸逸又係眼定定咁望住高飛，但又唔敢接觸，好搞笑。
因為昨晚去過香港迪士尼樂園酒店的PLAYROOM，覺得那兒的STORYBOOK PLAYROOM比HOLLYWOOD HOTEL的馬里布遊戲室適合逸逸得多，所以決定番房間執行李辦埋CHECK OUT再過去STORYBOOK PLAYROOM玩。
走之前影番張招牌相先
逸逸一入到去STORYBOOK PLAYROOM就立即進入狀態，自己拎起波波黎玩。
又同外國姐姐一齊玩保齡球樽
玩下滑梯喇，不過因為逸逸唔識收埋隻手唔好撞埋隔離個城堡，所以我都唔敢俾佢自己滑。
玩下廚房D玩具
恆仔叫逸逸去坐船，不過逸逸掛住周圍走。
逸逸成日眼定定望住有個姐姐的米妮，我在玩具架拿了另外一隻米妮給她，但她仍然是比較喜歡姐姐的米妮。
上次在阿妹屋企推曉曉架車仔已經推得好開心，係依度又係好鐘意，不過推左一陣就比大個佢既姐姐搶走左…
玩下大LEGO喇~
仲可以騎POOH POOH添呀，彈下彈下都唔知幾過癮。
本來諗住下午去迪欣湖的，但因為出面落雨，反正逸逸又已經好眼瞓，無謂再係迪士尼食午餐了，於是我們的FAMILY WEEKEND AT DISNEY就正式完滿結束喇。