2017-10-30 我十三個月大了﹗(1Y1M0D)

我13個月大了!

今個月爸爸媽媽帶左我去日本旅行,好開心呀,見到好多可愛的卡通人物,第一次食雪糕、第一次飲果汁、第一次食和牛,正!我係日本學識左用杯飲水,日本餐廳對小朋友好好,一定會預備一杯冰水俾我,又會提供靚靚兒童餐具,唔似昨日跟爸爸媽媽去飲茶,爸爸媽媽明明話三位,酒樓姨姨一見我係BB就收剩兩份餐具。

今個月,我去左人生的第一次面試,去到一個叫學校既地方有玩具玩,有得唱歌跳舞同埋睇書,又有好多小朋友,最後要坐低同一個好溫柔的姨姨傾計,姨姨俾我玩既野我都唔知係乜,不過我話俾姨姨知枱面有架車車,姨姨就好開心喇!

我依家仲未可以放開爸爸媽媽隻手自己行路,但係我可以由V City羅麥記行到番聖堂,我好鐘意行樓梯,我可以跨過地面的障礙物,我仲好鐘意踢波波添!

最近大家都話我識講多左好多野,婆婆、冬冬(公公)、姨~(暐姨姨)、姐~(曉曉表姐)都叫到架,不過想叫咪叫囉,所以都係曉曉表姐最體貼,我唔叫佢時佢會話等我大個D先叫佢。另外,樹樹、花花、雀雀、車車、貓貓、Dog Dog、兔兔、馬騮、米奇、米妮、鞋鞋、襪襪、抱抱都識講,聽個方面呢,簡單黎講就係你講d同我生活相關的我都聽得明白架,唔駛擔心。

依家曉曉表姐唔再話我太細個,好多野都預埋我一齊玩,又教我好多唔同既野,又讚我識唱少少歌。早兩日我地一齊去逛宜家傢俬,曉曉表姐仲帶我入帳幕同其他小朋友一齊玩添呀!我每次見到曉曉表姐就好開心。

食野方面,除左太硬同太黏對我有危險的食物之外,爸爸媽媽乜都俾我食,但係有時大人的食物太過濃味,還是清淡的食物比較啱我口味。不過,我最愛的仍然是媽媽奶,媽媽我要話你知,你的禁酒令仍然要繼續啊﹗

Comments

comments

3 則迴響於《2017-10-30 我十三個月大了﹗(1Y1M0D)

  1. 曉曉當時明明都只得兩歲半多少少,居然咁體貼,實在太sweet了~
    而家逸逸成日「曉曉表姐」、「表姐」咁叫啦~

發表迴響

你的電子郵件位址並不會被公開。 必要欄位標記為 *