洋蔥檸檬焗三文魚

三文魚係冰箱的好朋友,而且放落焗爐就可以,絕對係快煮恩物,之前試了幾個食譜都唔太滿意,今次隨意發揮反而覺得味道唔錯,而且逸逸仲讚話係今天晚飯的NUMBER ONE,跑嬴咗蕃茄炒蛋,所以都值得記得做法。

材料:

  • 三文魚柳      1片(約120g)
  • 洋蔥             1/3個
  • 檸檬             2片(薄片)
  • 海鹽             適量
  • 黑胡椒         適量
  • 橄欖油         適量

做法:

  1. 三文魚柳解凍後抹乾魚身,用適量海鹽、黑胡椒及橄欖油抹均勻。
  2. 洋蔥切絲,用適量海鹽和橄欖油撈勻。
  3. 預熱焗爐190度。
  4. 錫紙上先放三文魚,加洋蔥絲在上面,在放上兩片檸檬,用錫紙向上對摺成山形,兩端封口向下摺,保存味道。
  5. 將三文魚放入已預熱的焗爐焗15分鐘即成。

韓式辣炒豬肉

早一日解凍咗一包急凍豬腩片,用咗一半嚟整泡菜炒豬肉,翌日就試新菜,搵咗個食譜煮韓式辣炒豬肉,材料簡單,惹味好送飯,唯一的壞處就係辣辣地唔啱小朋友食。

材料:

  • 五花腩片 (切成長條狀)          300g
  • 洋蔥 (切絲)                            半個

醬汁:

  • 韓式辣椒醬                            1.5湯匙
  • 生抽                                       1湯匙
  • 米酒                                       1湯匙
  • 糖                                           1茶匙
  • 胡椒粉                                    適量

調味:

  • 麻油                                       1茶匙

做法:

  1. 將醬汁之調味料拌勻備用。
  2. 中火熱鍋,倒入適量的食用油,放入洋蔥絲拌炒至軟化。
  3. 放入肉片拌炒至上色。
  4. 倒入醬汁拌勻,再放入麻油拌勻即可。

備註:上面是我的做法,只放我家有的材料,味道已經不錯,可按下面連結看我的參考食譜,達至更佳的效果。

參考食譜:宅家煮/韓式經典端上桌!微辣開胃「韓式辣炒豬肉」怎麼在家做?(內有影片教學) | Vogue Taiwan

蕃茄炒蛋

有一日買了一本U MAGAZINE,入面教煮好似香港家庭個個都識煮的蕃茄炒蛋,不過我一向煮的蕃茄炒蛋只係加鹹加水炒,所以食落無乜汁,見到雜誌張圖好多汁好似好好送飯,於是就跟佢食譜試下,又真係好好味喎~

材料:

  • 蕃茄             2個
  • 雞蛋             3隻
  • 片糖            半片
  • 茄汁             2湯匙
  • 喼汁             3湯匙
  • 幼鹽             少許
  • 生粉             適量
  • 水                 適量

做法:

  1. 蕃茄去蒂切角,片糖切碎。
  2. 打蛋,逐隻蛋黃上落鹽,拂勻成蛋漿。
  3. 大火燒熱鑊,落油及蛋漿,以中火慢慢火煎炒約30秒至九成熟,盛起備用。
  4. 蕃茄落鑊以中火炒約30秒至半熟,落片糖碎,轉小火炒至番茄果囊開始融化,加入一湯勺水至水位大約蓋過番茄。
  5. 落鹽、茄汁及喼汁兜勻,再炒2分鐘,逐少慢慢落生粉芡,兜勻至芡汁能掛鑊鏟上。
  6. 雞蛋回鑊,略煮5秒便可上碟。

備註:原食譜用白醋我自己改用喼汁,這個替代法已試過不同的食譜,效果都唔錯;另原食譜落蕃茄前會先爆香薑蓉,另落茄汁後加蔥段,相信可增添香氣,不過屋企無這些材料,所以略過。

上海菜飯

逸逸唔係太鍾意中式煮菜的食法,但食上海菜飯就會乖乖成碗連菜都食埋,所以決定試下自己係屋企整上海菜飯,結果大成功,好食到逸逸話要添飯呀﹗

材料:

  • 白米              1.5杯
  • 雞湯              按飯煲煮飯指引
  • 小棠菜/白菜   4兩
  • 金華火腿        1隻麻雀SIZE
  • 薑                  2片
  • 橄欖油           1茶匙

做法:

  1. 將金華火腿及小棠菜切碎。
  2. 白米洗淨後,放入電飯煲,加入雞湯,開始煮飯。
  3. 用中火燒熱鑊,加少許油,加入薑片炒香,加入金華火腿炒香,加入小棠菜炒勻。
  4. 飯熟時,加入金華火腿、小棠菜及橄欖油拌勻,即成。

韓式鮑魚粥

自從BABYMOON係韓國食過一碗超級美味的鮑魚粥之後,係屋企跟唔同食譜都整過好多次鮑魚粥,不過以今次跟白鍾元依個食譜最正﹗

材料:

  • 鮮鮑魚                     8隻
  • 紅蘿蔔                     1條
  • 麻油                         4湯匙
  • 雞蛋                         每人1隻
  • 鹽                             適量(按口味)

做法:

  1. 米洗淨後浸泡在水裡半小時,瀝水備用。
  2. 將湯匙插入鮑魚殼和肉之間取出鮑魚肉。
  3. 用剪刀剪下內臟,這時注意不要弄破內臟。
  4. 將鮑魚切成薄片,切片時發現堅硬的牙齒要取出。
  5. 內臟用刀剁細。
  6. 紅蘿蔔切丁。
  7. 開火,在鍋裏加入4湯匙麻油。
  8. 先炒米之後,加入切成薄片的鮑魚,讓米和鮑魚吸飽麻油。
  9. 加入剁細的鮑魚內臟。
  10. 用勺子均勻地攪拌米、鮑魚和內臟。
  11. 鮑魚炒熟後倒入飯煲,按飯煲指導配合米量加水。
  12. 按煲粥鍵開始煲粥。
  13. 將雞蛋分成蛋黃和蛋白。
  14. 在粥煲好前大約10分鐘加入紅蘿蔔和蛋白。
  15. 粥煲好後加鹽調味。
  16. 盛盆後再加上蛋黃即成。

參考食譜:跟著韓國食神白種元學做料理》鮑魚粥-風傳媒 (storm.mg)